Un dí d'invernu frecc mè 'n bis (di nonnopipo - Forsa Nuara)

TUTTOmercatoWEB.com

Un dí d'invernu frecc mè 'n bis, cunt al giasc che sciapa i sòli,
a l'impruvis al mund intér as n'acorgia cl' è finì 'l petroli.

L'è tütt fermu, as mova gnenta, manca anca l'eletricità,
mora da frècc ogni persuna e tütt al mund l'è cundanà.

'S poda mia riscaldas ghè bisogn da viscà 'l föch.....
...as brüsa tüta la mubilia e di fiulin parfin i giöch.

Al büffé e l'ütumana tuti e dü dal prim settcent,
i finisan dent al föch sensa gnanca pensá un mument.

Al prublema, da cui gross, l'è che suma urmai pü bon,
da lavrá druvand i man, e suma intrech mè di cravón.

Suma bon da fà pü gnent, suma tüta tecnulugía,
suma tüti di sciensiá ma cunt i man nissün agh pia.

Una volta par mangiá as faseva andá la tèra,
e cunt i man a druvai mal as faseva anca la guèra.

Ma incö, tüti impigrí, e gnürant cumè un fratáss,
cunt i man suma pü bon gnanca da suffiás al nas.

Ghè da cultivà la tera, cunt al badil spelás i man,
a ghè pü nè sciur nè povar e 's mora prima da dumán.

Suma nün dess i padron, pruprietari d'un bel gnent,
al mund l'è brüt sensa la storia, al mund l'è fai par la so gent.

ma un pruverbi vécc mè 'l bacüch, al disa da mai tirá la corda,
e la gent, sensa memoria, dal temp indré prestu sa scorda.

Uma distrütt tüti i furesti, e büsgá la tèra e i mar,
is n'uma mia n'acurgiü d'avegh i bö davanti 'l car,

e adess che 'l dann l'è fai e i bestii in scapá fora
i ciavuma la porta dla stala, e la gent da fam la mora.

Sensa la television e cun la not fudrà da négar,
'na cüntula d'un quai vécc al tegna tüti quanti alégar.

'S ricumincia dal princípi, da trimila ani fa.....
la speransa l'è che sta storia a un quai cus la servará.

Adess in ciel un quart da lüna, sensa tanti riverensi,
la và a gratás un toch da panscia sü la cüpla 'd San Gaudensi.

Nonnopipo