E st'invernu ch'al sà d'autün cunt' l'aria spurca e inquinà (di nonnopipo)

TUTTOmercatoWEB.com

E st'invernu ch'al sà d'autün cunt' l'aria spurca e inquinà
i so mia par quala rasòn am riporta indrè al passà.

Quand sül camp in fianch d'l'Agogna, pena prima dal cürvòn,
in mess d'la fanga e sensa l'erba s'alenavan i mè campiòn.

Eran temp che süi majeti gh'eran mia scritt i nom,
i avversari is ciamavan Lecch, Telgate, Büst e Com,

e si büti pussè indré i cunfin dla mè memoria,
là, in fund sui camp ad l'Enel, la cumincia 'na bèla storia,

fai d'amur, da giuvinessa, da speransa e d'alegria,
quand giugavan cui dal Nuara i vürevi pü 'ndà via.

Adess s'alenan in t'un post che a guardal at manca al fià,
la palestra, al camp sintetic, disan che ghè anca la spa !!!!???

Manca gnenta ... a ghè tüt ...... par fa ben al to mistè,
a ghè fin un president che tüti i mes al cacia i danè.

E là in scima, la savuma, as respira l'aria fina,
aria azzurra, aria buna, cume l'aria dla matina.

Però 'dess ch l'è quasi ura i fò un tüff dentar la storia,
ricurdà cui giügadur che gh'ho impress dent la memoria.

I cumenci cunt al Tato cunt un fisich da paüra
che pruvà a fagh un gol l'era propi tantu düra,

pö al Nini tütt pelà e al Canto cunt la mascagna,
a vedei giugà in difesa l'era cume na cücagna,

e 'l Renato al Gavinell svicc mè 'l fülmin d'un tempural,
al cureva sü la fassa e 's pudeva mia fermal.

Al Carrera, nümar vott che 'l rivava da Burbané
al saveva cusè fa cunt al balòn in mess di pè,

e al Ricu cunt al cü bass che smeava andá in guèra,
anche se ogni tri per dü al finiva semp par tèra.

Al Giannini al Milanesi, al Gabetto barbison,
par andà a l'Alcarotti gh'era sempar 'na rasòn.

Adess peró cun gran rispett vöri fa un grand inchín,
i la fò al mè President, al Tarantula Sciur Santin.

Forsa Nuara tüta la vita

Buon anno a tutti