Ho pruvà par un mument a giügà cun la fantasia ..... (di Maurizio Sguaita)

Ho pruvà par un mument a giügà cun la fantasia.
Ho pruvà pensà un mument da Nuara duvé 'ndà via.

Andà a viv da furèsté int una quai cità d'Italia,
a Türín, forse Milán, Ruma, Siena, o Senigallia.

La Mole, al Dom, al Colosseo, e a Senigallia ghè anca al mar,
mah...sò mia...luntan dla cüpla, son mè un can sensa 'l culàr.

Si, la so, chí giá a Nuembar, la nebbia as tàia cunt al curté,
e ghè anca l'ümidità che 't bagna dla testa fin ai pé,

e d' està 'na quai sansára, da nott at lasa mia durmí
ma però la mè Nuara am piasa sempar anca cusí,

Sarà furse un po' scuntrusa un po' grisa e un po' nuiá,
ma par mi, dal mund intér, l'è la püssè bèla cità.

La so punta, la sü 'n tl'aria la büsga 'l ciel cun ardimént,
l'è 'l dit dla man dal nost Signur che 't mustra la stra par vés cuntént,

cula stra cl' è la to vita e che la passa da Nuara
cume l'anima scundü in fund d'un puss cun l'acqua ciàra,

cume 'na rösa pena düèrta bagnà dla brina a la matina,
cume un fiùlin che slarga i öcc davanti ai giöch d'una vedrina,

cume un rundón che' l turna sempar indua 'l nid l'è fai l'ann prima,
mè 'na muntagna cla smea biuta sensa la fiòca sü la scima,

cume l'azzurro, cl è 'l nost culúr, e da not al lüsa mè 'na stèla,
mè 'na cüntula davanti 'l föch, quand fora a piova egh và l'umbrèla,

mè la pell d'oca che vegna indoss a sentí 'l nom dal stadio vécc,
cume quand a ghè tempesta e ti 't ripari suta un técc,

cume 'na prösa da magiustri ch' la veda una dacquadúra,
cume la nostra maia azzurra che numà 'l südur la unúra,

cume un pensier che cume un ciod, a s'impianta fiss in testa,
mè una puesia in dialèt ch' am disa : "la to cità l'è questa !!!!"

Nonnopipo