Son pasà in fianc 'na gesa, una gisióla da muntagna (di nonnopipo)

TUTTOmercatoWEB.com

Son pasà in fianc 'na gesa,una gisióla da muntagna,
là int l'aria, pugià sü 'n bricch, indua la vista la guadagna.

Che silensi, che bell fresch, in mess dal busch cun l'aria fina,
a guardala l'è tantu bèla, la smea fin 'na cartulina !!

A ghè un' aria misteriusa, la smea quasi a una preghiera,
che in silensi, dasi dasi, ti la reciti a la sera.

Senta....adess a s'alsa 'l vent, tira un'aria pulida e fresca,
nivli scüri sü int al ciel...da chì 'n po' farà tempesta !!

Ma 'l senté l'è lungh e scür, farò mia in temp rivà a cà....
guardi indré vers la gisiola...forse Lü m'uspitarà !!

Düerdi dasi cula porta...devi fin un po' sbassàm....
...una vus legera e smorta am disa: "vegna innai mè bell salam !!"

Suspetus im guardi 'n gir, ghe nissün dent la gisiola
i g'ho fin un po' paüra mè 'n fiulín al prim dì a scola.

Porti i öcc a guardà int l'aria...mi...in gesa...l'è roba strana !!
pica l'acqua già süi vedar...dla finestra una scalmana !!!

"Son stai chì par tanti ani, semp tacà chì sü sta crus....
famm sentì cume ti preghi, famm sentì un po' la tó vus !!

I rispundi pena stremì "i son bon pü da pregà....
...in cent'ani che i preghieri im ho urmai dismentigà !!"

"Dai...fa gnenta...sta quaiet, i na podi fa anche sensa...
im cuntenti manumà d'ascultà la to cusciensa."

I sto citu, i banfi gnanca, i pensi a tüti i mè erur....
....ma sta vus che la rimbumba lè la cusciensa o l'è 'l Signur ?

La tempesta l'è finì, 'dess al sul al guarda indré,
ciapi sü i mè dü strasc e m'anviàri sül senté.

Nonnopipo