Puesia puesia che ti devi truvá la rima (di nonnopipo)

Puesia puesia che ti devi truvá la rima
sü la cüpla 'd San Gaudensi
prova un po' a purtam in scima.

Sü lá in t'l'aria a smea mia,
ma al mund l'é un fasulett,
e mi 'm senti picinin,
insema a tüti i mè difett.

Da luntan al Monte Rosa,
cume una grosa gésa,
dasi dasi vers al pian
as cumincia la discesa.

E se i guardi dl'altra part,
dopu che indré m'ho girá,
a ghé mia da scunfundas
i risèri in chi tacá.

Da chí 'n tl'aria, la mé cittá,
l'é ancura püssé bèla
e vüré a vess precis
a ma smea una stèla.

Lá in fund a ghé i cinin
che da Vevar in i padron,
Sant'Agabi ghé i ranat
che la fann da prufession,

San Martin cun i assassin,
l'é mai stai 'na nuvitá,
propi cume a Perná
che in ciamá "massacürát"

e a Sant'Andrea vann a spass,
tra 'l sutpasagg e la feruvia,
bei quaiet i rimulas,
che nissün ia porta via.

Dess che i guardi un po' chi sutta,
e che l'occh ma scapa via,
ma cus l'é sta smagia verda
cunturná da puesia ?

Quasi in fianc al mercá coperto,
al Valentino lá da dré,
se al Nuara al segna un gol
i saltan tüti quanti in pé.

Ma che bell ch l'é l'Alcarotti !!!
quanta gloria e allegria !!!!
quand ti s'eri setá dentar
ti vürevi pü andá via.

Cari fiöi iv ciami scüsa,
i m'ho fai ciapá la man
ma 'l Nuara l'é una spusa
sensa trüch e sensa ingann.

Adess I bevuma un bicèr da vermouth,
prima da disvigiam dal sògn
insema al Nino, al Ciumi e i altar,
parchè di amis t'è da bisògn.

Dopu i vegni gió d'la cüpla
anche se son mai stai sü,
i sugnavi ad occh düert,
I prumetti...., la fo pü.

Forsa Nuara tüta la vita

Nonnopipo