I gh' avevi si e no vott o növ ani ... (di nonnopipo)

TUTTOmercatoWEB.com

I gh' avevi si e no vott o növ ani,
che 'l mé siu, bruncá sü la bicicleta,
insema al Tigliu, al Bertu e al Bursàn,
as partiva tüti insema dla piasèta.

Via Verbano tüt d'un fiá, as pudeva mia fá tardi,
as dueva fá una tappa propi al circul Leonardi.

Quatar bicer e un po' da grapa sgardiuná in pé al bancón,
un leca leca e una spümin l'era la mé cunsümassion.

E par mia fá d'intort, arivà sül largh Buscaglia,
un'altra sosta al Matteotti e cusí nissün sa sbaglia.

Al Bursán as na n'acorgia: "fiöi, cumincia la partida !!!!"
via da cursa all'Alcarotti, rivá in temp l'era una sfida.

Da luntan as senta i vusi suma ancú rivá in ritard !!!!,
vün al vusa e as senta ben: "arbitro ti sé un gran bastard"

"Dai, avanti, fasuma in pressa damm tre cürvi par piasé !!
Al fiulìn al paga mia, l'è poch püssè che un magaté !!!"

Al Bertu e 'l Tigliu is rampígan, sü cui ass da legn bagná,
inveci mi, 'l mè siu e 'l Bursan tacá dré la raminá,

propi quand, porca la logia, al Nuara al ciapa un gol,
e al Tato, un aversári a la ciapa par al col,

Sü la cürva l'è 'na ribulgia, ghè pericul d'invasión,
quand al Ricu cun un tirasc, dent la ret infila al balón.

Forsa Nuara !!, forsa Ricu !!, sta sü in pé va mia par tèra !!!
se na fasuma ancura vün i vinciuma anca sta guèra.

Adess al Ricu, la bala 'nti pè al cura dricc par scriv la storia,
na salta vün... na salta dü ma 'l ters la ransa mè 'na siloria.

Stramassa al Ricu la facia 'nt la fanga, l'è par tèra ma cun unúr,
intant al "bastard e disunest" l'è sübiá e 'gh dà 'l rigur.

Salta in pé tütt l'Alcarotti e 'l President, al Sciur Santin,
al cura vers al Ricu Bramati e sü la frunt agh dá un basín.

La partida la finisa e dü a vün l'è 'l risültà,
però adess in bicicléta dasi dasi as turna a cá.

Alura al Tigliu infurma i altar, che prima da turnà indré,
se is fermuma mia a la Crava da duman al cambia mistè.

Par la granda caritá !!!! füssa mai sta roba brüta !!!
urdinuma una margherita e la spassuma fora tüta.

In vott'uri, peró dla sera...piantumla lí da fa i paiásc,
e 'l Bursan 'l fá una pruposta : "nduma a scena 'n di Spinasc !!"

"Noooo !!!! la dona pö am vusa, vürarisi mia rüsá !!!!!
pö gó dré al mé nivud, i la devi purtá a cá"

"Sculta siu Mario, stó chí quaièt, faró mia tribülá,
al Nuara l'é vinciü dai !!!! anduma a festeggiá !!!!

Forsa Nuara tüta la vita